Астана тұрғыны жалға алынған көліктерді сатқан

Астанада полицейлер жалға алынған көліктерді сатуға қатысты алаяқтық әрекет топтамасын әшкереледі, деп хабарлайды Polisia.kz.

Тергеушілер 40 жастағы қала тұрғынының көліктерді ұзақ уақыт жалға алып, кейін достары мен туыстарына арзан бағаға сатып жібергенін анықтады.

Бірнеше айдан кейін көлікті беріп, құжаттарын тапсырамын деген өтірікпен алаяқ қомақты қаржы иемденіп отырған. Мәселен, бір жағдайда Kia Sportage көлігін сатып, 6 миллион теңге алған. Тағы бір жағдайда жәбірленуші оған Toyota Camry көлігінің иесі боламын деген үмітпен 7 миллион теңге берген.

Полицияның мәліметінше, оншақты алданған азамат табылды, бірақ зардап шеккендердің саны одан да көп болуы мүмкін. Қазіргі уақытта алаяқтыққа қатысы бар барлық адамдарды анықтау және жауапкершілікке тарту мақсатында сотқа дейінгі тергеу амалдары жүргізілуде.