Астана тұрғынынан мефедронның ірі партиясы тәркіленді

Есірткі заттарды аса ірі көлемде заңсыз сатқаны үшін Астана тұрғыны 15 жылға бас бостандығынан айырылуы мүмкін.

Есірткі қылмысына қарсы күрес департаментінің қызметкерлері аса ірі көлемде мефедрон жеткізу және сатумен айналысқан Астана тұрғынын қолға түсірді. Ол бұл «кәсібін»  астананың өзінде де, одан тыс жерлерде де жалғастырған.

Аталған факті бойынша Қазақстан Республикасы Қылмыстық кодексінің 297-бабының 3-бөлігінің 5-тармағы «Электрондық және ақпараттық ресурстарды пайдалана отырып, есірткі құралдарын, психотроптық заттарды заңсыз өткізу» бойынша сотқа дейінгі іс қозғалды, деп хабарлайды Polisia.kz.

«Оны ұстау кезінде жедел қызметкерлер әрқайсысында 10-нан 30-ға дейін оралған бетбелгілері бар 30 есірткі қалташасын  тәркіледі. Сарапшының қорытындысына сәйкес, тәркіленген зат психотроптық зат – мефедрон болып шықты, жалпы салмағы 843 грамм. 35 жастағы Астана тұрғыны оларды жасырып үлгермеген. Сондай-ақ  полицейлер күдіктінің ұялы телефонын тәркіледі, онда есірткіні сату бойынша  хат алмасу және мефедронды сату туралы ақпарат бар» деп хабарлады полиция.

Күдікті уақытша ұстау изоляторына қамалды. Полиция қызметкерлері қылмыстық әрекетке басқа қатысушыларды анықтайтын болады.