Астана тұрғыны 10 көлікті дөңгелексіз қалдырды

Астанада тоқтап тұрған көліктердің дөңгелектерін шешіп жатқан ұры ұсталды.

Полицейлер аулаларда тұрған көліктердің дөңгелектерін ұрлаған 30 жастағы елорда тұрғынын қолға түсірді. Хабарланғандай, ер адам түнде ғана «жұмыс істеген».

«Алдын ала ол тұрғын үйлердің аулаларында ұзақ уақыт бойы қозғалыссыз тұрған көліктерді түгендеп алған. Сөйтіп, ол «Мерседес Бенц» автокөлігі иесіне 150 мың теңге көлемінде залал келтіріп, титан жиегі бар дөңгелектерді ұрлап кеткен. Тағы бір  BMW-ның да төрт дөңгелегін бірдей үптеп кеткен. Ұрланған заттарды металл қабылдау пунктіне және дөңгелек жөндейтін орындарға  тапсырып отырған»  деп нақтылады ҚР ІІМ.

Нәтижесінде, астаналық осындай 10 ұрлық жасады деген күдікке ілінген. Ол қазірдің өзінде қылмысын мойындады, заттай айғақтар тәркіленді. ҚР Қылмыстық кодексінің 188-бабы «Ұрлық» бойынша сотқа дейінгі тергеу амалдары жүргізілуде. Ер адам уақытша ұстау изоляторына қамалды.