Астана көшелерінің біріне марқұм  өрт сөндіруші Забикулиннің есімі беріледі

Мемлекет басшысы бүгін Астанадағы ауруханада қайтыс болған өрт сөндіруші Асқар Зәбикулиннің отбасына көңіл айтты. Ол үш адамды өрттен алып шығып, ауыр күйік алған.

Мемлекет басшысы Қасым-Жомарт Тоқаев бүгін Астанадағы ауруханада қайтыс болған өрт сөндіруші Асқар Зәбикулиннің туған-туыстары мен жақындарына көңіл айту жеделхатын жолдады. Асқар  адамдарды өрттен шығару кезінде жарақат алған.

Президент ержүрек өрт сөндірушінің есімін мәңгі қалдыруды тапсырды – елорда көшелерінің біріне оның есімі беріліп,  бюсті  орнатылады.

«Асқар Серікұлы төтенше жағдайлар саласындағы қызметімен елімізге адал қызмет етудің үлгісін көрсетті. Астанада көпқабатты үйдегі өрт кезінде ол оқиға орнына дер кезінде жетіп, бірнеше адамның өмірін аман алып қалды. Ол өз әрекетімен Отан алдындағы азаматтық борышына адалдық пен теңдесі жоқ ерлік көрсетті. Оның есімі мен жарқын бейнесі біздің жүрегімізде мәңгі сақталады»  делінген жеделхатта.

Еске салайық, Забикулин зардап шеккен өрт 16 қарашада Момышұлы даңғылындағы 15 қабатты үйде болған. Өрт сөндіруші он жасар баланы, 80 жастағы әже мен оның 22 жастағы немересін өрттен аман алып шықты.