«Астана-ЭТК» АҚ сол жағалауда болған апат себебін түсіндірді

«Астана-ЭТК» АҚ  елорданың сол жағалауындағы учаскелердің бірінде болған апаттардың себебін түсіндірді, деп жазады ORDA.

«Астана-ЭТК» АҚ (энергия таратушы компания) баспасөз қызметі таратқан хабарламада: «30.01.2021 ж. 20 сағат 58 минутта «Сол жағалау» қосалқы станциясының 407 нөмірлі 10 кВ ұясында авариялық тұйықталу болды. Сығанақ, Түркістан, Алматы көшелерінің бойындағы 6 тұрғын үй кешеніне энергия тасымалдау жағынан қиындықтар туды. Жедел топ бір сағат ішінде тұрғын үй кешендерінің (жылыту, сумен жабдықтау және лифтілерді пайдалану) жалпы үй қажеттіліктері үшін бес дизельді генератор жиынтығын орнатты. «Есіл» тарату аймағының жедел-жөндеу топтарының, кабельдік желі қызметі, сынақ және диагностика қызметінің көмегімен 19 адам кабельдік электр желісін қалпына келтірді» делінген.

31.01.21 күні сағат 14:17-де электр энергиясы 6 көпсалалы тұрғын үй кешенінде толығымен қалпына келтірілді. Апат себебіне келер болсақ,  кабельдік тасымал ашылған кезде оқшаулағыш қабаттағы ақаулығы бар кабельден зақымдану анықталып, екі муфта ауыстырылды. Желіні толық қалпына келтіргеннен кейін, тұрғын үй кешендеріне екінші қуат беруді қамтамасыз ететін резервтік кабельдік желіде жөндеу жұмыстары жүргізілуде.

«Астана-ЭТК» АҚ бас инженері Руслан Әбжановтың айтуынша, тұрғын үй кешенін салушылар желілерді жергілікті атқарушы органдардың балансына өткізбеген. Бүгінде бұл желілер тіркеуден өтіп, «Астана-ЭТК» балансына беру сатысында тұр.

Айта кетерлігі, бұл үйлерге электр энергиясымен бірге кеше түнде жылу мен су да берілмеді, өйткені электр қуаты сөнгеннен кейін су және жылумен жабдықтау сорғылары жұмыс істемей қалған.