Астана әуежайындағы жанжал үшін жолаушы жазаланды

Жолаушы рейстің тоқтатылуына қатты ашуланып, нәтижесінде ұрып-соғу және ұсақ бұзақылық үшін әкімшілік айыппұл арқалады.

Оқиға 25 ақпан күні Астана әуежайында болған. Fly Arystan әуе компаниясының өкілдері жолаушыларға Астана-Шымкент рейсінің ауа райының қолайсыздығына байланысты кейінге қалдырылғанын хабарлаған. Ұшағын күткен жолаушылар реніш білдіре бастайды. Кейбіреулері заттарды, сөмкелер мен пластик бөтелкелерді лақтырып, әуежай өкілдеріне жұдырық ала жүгірген.

«Іс барысында осы рейспен ұшқан Астана қаласының 27 жастағы тұрғыны анықталды. Елорда тұрғынына қатысты ҚР ӘҚБтК-нің 434-бабының 1-бөлігі «Ұсақ бұзақылық» және ҚР ӘҚБтК-нің 73-2-бабы «Ұрып-соғу» бойынша әкімшілік хаттамалар толтырылды» деп хабарлады  Астана полициясы.

Жағдай қалыпқа келтірілгеннен кейін әуе билеттерінің құны рейс жолаушыларына қайтарылғаны атап өтілді. Азаматтық авиация комитеті КС-7307 Астана-Шымкент рейсі Airbus-A320 ұшағымен таңғы сағат 05-40-қа жоспарланғанын түсіндірді. Бірақ ауа райының қолайсыздығынан (Шымкент әуежайындағы қатты жел) рейс кейінге шегеріліп, артынша тоқтатылды.

«Жолаушыларға рейс мәртебесінің өзгеруінің барлық фактілері бойынша тиісті хабарламалар жіберілді. Ұшуды күту кезінде қолданыстағы заңнамаға сәйкес жолаушыларға алкогольсіз сусындар мен ыстық тамақ беру ұйымдастырылды. Сондай-ақ өтініш берген барлық жолаушыларға билет құны  толық қайтарылды»  делінген мекеме  хабарламасында.

Азаматтық авиация комитеті мен Қазақстанның авиациялық әкімшілігі аталған факті бойынша қосымша тексеру жүргізіп, авиакомпания тарапынан бұзушылықтар анықталған жағдайда тиісті шаралар қабылданатынын айтты.