«Әскери құрылыс» кәсіпорнының қызметкерлері сегіз жылға сотталды

«Әскери құрылыс» АҚ-ның бұрынғы басшысы Ерлан Тәжіденов пен оның ағасы ұйымдасқан қылмыстық топ құрды және ұрлық жасады деген айыппен сегіз жылға сотталды.

Бұл туралы Антикор хабарлайды.

«Астана соты Тәжіденовті, оның ағасы мен қарамағындағыларды 8 жылға бас бостандығынан айырды. Олар бақылаудағы «Әскери құрылыс Астана» ЖШС-нің қаржылық және корпоративтік қызметіне жауапты болды» деп түсіндірді сыбайлас жемқорлыққа қарсы іс-қимыл департаменті.

Олар еншілес компаниялармен жалған келісімдер жасасып, бюджет қаражатын ұрлау мақсатында құрылған ұйымдасқан қылмыстық топқа жетекшілік етті және оған қатысты деп айыпталды. Келтірілген шығынның жалпы сомасы 596 миллион теңгені құрады.

Үкім заңды күшіне енген жоқ.