«Әскерден емес»: Қорғаныс министрлігі соғыссыз-ақ қаза болған сарбаздар жайлы пікір білдірді

Қазақстан Қорғаныс министрлігі бейбіт уақытта әскерилердің қаза болуы және әскердегі әлімжеттік туралы қоғамдағы пікірлер шындыққа жанаспайды деп есептейді, деп хабарлайды Orda.kz.

Қорғаныс министрінің орынбасары Шейх-Хасан Жазықбаевтың айтуына қарағанда қайғылы оқиғалардың 90 пайызы әскери қызметке қатысты емес.

«Қоғамда екі қате түсінік бар. Бірі – бейбіт уақытта әскерилер қаза табады деген. Екіншісі – әскерде әлімжеттік бар деген жалған пікір», — деді Жазықбаев брифинг барысында.

Ол әскери қызметтің оқу-жаттығуларға, әскери техникаға және жаттығуларға байланысты қауіптерден тұратынын атап өтті.

Өкінішке қарай, қазір әскерден мүрдесі қайтқан сарбаздар жайлы жаңалықтар қаптап кетті. Жазықбаевтың пікірінше, олардың бәрі дерлік әскери қызмет cалдарынан емес.

«Өлімнің негізгі себептері — қауіпсіздік шараларының бұзылуы, жол апаты оқиғалары, өзіне қол жұмсау және аурулар. Бұл оқиғалардың 90 пайызы әскери қызметке қатысты емес», — деді министрдің орынбасары.

Сондай-ақ, Жазықбаев соңғы үш жылда әскердегі қылмыс пен жарғыға қайшы заң бұзушылықтар саны 28 пайызға азайғанын хабарлады.