Асқар Садықовтың орнына жаңа депутат келді

Парламент мәжілісі комитеттерінің біріне жаңа депутат Серік Ерубаев сайланды, деп хабарлайды Orda.kz.

Жаңадан сайланған депутат биыл жазда мандатынан айырылып, «Ақ жол» партиясынан шығарылған Асқар Садықовтың орнына келді.

«Бүгін біздің қатарымызға Мәжілістің «Ақ жол» партиясынан депутат Серік Ерубаев қосылды», - деді палата спикері Ерлан Қошанов жалпы отырыста.

Мәжілістің жалпы отырысында Заңнама және сот-құқықтық реформа комитеті құрамына Серік Ерубаев  сайланды. Оны депутат Снежанна Имашева басқарады. Серік Ерубаев партия төрағасының өңірлермен жұмыс жөніндегі орынбасары болды. Сондай-ақ VII сайланған Парламент Мәжілісінің депутаты атанды.

Ол Атырау қалалық мәслихатының III-V шақырылымының депутаты, 2003-2012 жылдары қалалық мәслихатын басқарды. «Atyrau Construction services ltd» ЖШС бас директоры болған.

Естеріңізге сала кетейік, бұған дейін Мәжіліс депутаты Асқар Садықовтың мандатынан айырылып, партиядан шығарылғаны белгілі болған еді. Азат Перуашев мұндай шешімге «Садықовтың депутаттық мәртебеге лайық емес әрекеті» негіз болғанын айтты.