Асқар Құлыбаев Қапшағайдағы үш жер телімін мемлекетке қайтарады

Алматы облысындағы сот Асқар Құлыбаевты Қапшағай су қоймасының солтүстік жағалауында орналасқан үш жер телімін мемлекетке қайтаруға міндеттеді, деп хабарлайды Orda.kz.

Қонаев прокуроры осы үш жер учаскесіне қатысты жасалған барлық мәмілелерді жарамсыз деп тануды талап етіп, сотқа жүгінді. 

Биыл ақпанда сот прокурордың талабын қанағаттандырмай тастаған еді. Сот бұл шешімін су қорғау аймағы мен жолағының ені жер телімдері жеке меншікке берілгеннен кейін ғана белгіленгенімен түсіндірді.

Алайда мамыр айының соңында Алматы облыстық соты басқа шешім қабылдап, барлық жер телімдерін сату мәмілелерін жойды және оларды мемлекет меншігіне қайтаруды міндеттеді. Сонымен қатар, сот бұл учаскелердің барлығы бұрынғы иесі Асқар Құлыбаевқа қатысы бар екенін анықтады.

Сот барлық мәмілелердің күшін жойды.

«Жер учаскелері берілген кезде олардың су қорғау аймағында орналасқаны, су қоры жерлеріне жататыны айқын болған» деп жазылған сот алқасының қаулысында.

Соттың көшпелі отырысында жер учаскелерінің бірінде демалыс базасы орналасқаны белгілі болды. Ол аумақта тұрғын үй, жылу пункті, қызметкерлер мен күзетшілер үйі, гараж және монша бар. Қалған екі учаске осы базаға жалғасып жатыр. Онда құрылыс нысандары жоқ, бірақ көгалдандырылған жасыл аумақ бар. Үш жер телімінің алғашқысы 2004 жылы Қапшағай қаласының әкімі Сергей Зеленскийдің шешімімен Қадыр Әлімбаевтың жеке меншігіне берілген. 2006 жылы ол учаскені «Тамыз-Ка» ЖШС-не сатқан. Бұл компания Асқар Құлыбаевтың немересі мен келіні — Бексұлтан және Нәйлә Құлыбаевтарға тиесілі болған.