Қасіретті қаңтар кезінде ұсталған 17 жастағы жасөспірімге қысым көрсетіліп жатыр

Қасіретті қаңтар кезінде алаңға шықты деген күдікке ілінгендердің көбі тергеу абақтысында қысым көріп жатқандары айтылуда. Адам құқығын қорғап жүрген өкілдер «күдіктілердің жағдайы адам шошырлық» деп отыр.

КТК телеарнасының хабарлауынша, тергеуге жазықсыздар да тартылған.

17 жастағы Артур Қожаниязов 17 қаңтарды ерекше үреймен еске алады. Себебі, сол күні дәрі алуға шыққан Артурды құқық қорғау қызметкерлері тергей бастаған. Артынша құжаттарын алған. Артур полицейлерге құжаттары мен өзінің үшінші топтағы мүгедек екенін растайтын құжаттарды көрсетсе де, оны көлікке отырғызып алып кеткен. Бөлімшеге кірген бойда құзырлы орган қызметкерлері оны соққының астына алған. Баланың әкесі бұл туралы тек ұлы ауруханаға түскенде білген.

«Дәрігерлер кеудесі ісіген деп жазып беріпті. Тергеуде  бетперде киген қызметкерлер аяусыз ұрып-соғыпты. Тіпті, мүгедектік куәлігін көрсетіп жағдайын айтса да сенбей, шашынан тартып күш көрсетулерін тоқтатпапты. Автомат тақап өлтірем деп қорқытқан.  Балам әбден әлсіреп еденге құлап түскенде барып алғашқы көмек көрсетіп,  кейін жедел-жәрдем шақырыпты. Ал, мен арыздана бастағанда Ерлан Беғамбаев есімді полиция бастығы өзіне шақырып алып, ұрған сержант біздің қызметкер емес, іс-сапармен келген деді. Осы жерде бәрін шешейік деп 300 мың теңге ақша ұсынды» дейді Артурдың әкесі Серік Қожаниязов.

Серік бірден жауапты органдарға арыз жазыпты. Қазіргі таңда іс прокуратурада қаралып жатыр.