«Қасіретті қаңтар» кезінде 225 адам қайтыс болды

Бас прокуратура мен денсаулық сақтау министрлігі орталық коммуникациялар қызметіндегі брифингте ресми мәлімдеме жасады.

Бас прокуратураның қылмыстық қудалау қызметінің бастығы Серік Шалабаев қазіргі таңда қаза тапқандардың санын айтты.

– Төтенше жағдай кезінді мәйітханаға 225 адамның денесі жеткізілді. Олардың бір бөлігі лаңкестікке қатысқан, ғимараттар мен құқық қорғау қызметкерлеріне шабуыл жасаған қарулы бандиттер. Қаза болғандардың ішінде 19 полиция және әскери қызметкерлер де бар. Өкінішке қарай, құрбандардың ішінде бейбіт тұрғындар бар, – деді Шалабаев.

Еске салсақ, 2 қаңтарда Қазақстанның бірқатар қалаларында, бірнеше күннен кейін әр облыста жаппай тәртіпсіздіктер мен қиратуларға ұласқан наразылық акциялары өтті. Олар еліміздің көптеген қалаларында, ең алдымен Алматыда полицейлерге, әскери және билік органдарына шабуыл жасады.

Қазақстан президенті Қасым-Жомарт Тоқаевтың үндеуінен кейін ҰҚШҰ елдері бітімгерлері елге жіберілді. Биліктің айтуынша, конституциялық тәртіп барлық аймақтарда қалпына келтірілген.

Тоқаев ҰҚШҰ әскери күштерінің Қазақстандағы ахуалды тұрақтандыруда үлкен рөл атқарғанын, олардың миссиясы орындалғанын атап өтті. 13 қаңтарда бітімгерлерді елден шығару басталды.