AsiaCredit Bank салымшыларына кепілдік өтемақы төленеді

Қазақстанның депозиттерге кепілдік беру қоры (бұдан әрі – KDIF) AsiaCredit Bank салымшыларына төлемнің басталу күні мен тәртібін жариялады, деп хабарлады KDIF баспасөз қызметі.

«АзияКредит Банкіндегі депозиттерінде, ағымдағы және кәртішке шоттарында ақшасы бар жеке тұлғалар мен кәсіпкерлер өтемақы төлеу туралы өтініш бере алады. Агент-банктің филиалдарында кепілдік өтемақы төлеуге өтініштер қабылдау 2021 жылдың 24 ақпанынан басталады және 2022 жылдың 1 мамырына дейін жалғасады», - делінген хабарламада.

KDIF «Еуразиялық банкті» қордың есебінен AsiaCredit Bank салымшыларына кепілдік өтемақы төлейтін агент-банк ретінде тағайындады.

«Карантиндік шараларға байланысты агент-банк қайтару сомасын тексеруге, өтініш беруге және төлемді қашықтықтан алуға мүмкіндік беретінін ескеріңіз. Салымшылар барлық осы процедураларды жүзеге асыра алады және eubank.kz сайтында толық ақпарат ала алады. Еуразиялық банк AsiaCredit Bank салымшыларына да қызмет көрсетеді», - деп атап өтті қорда.

Өтемақы төлемдері банктің лицензиясынан айыру күніне есептелген салым үшін сыйақыны ескере отырып, клиенттің қалдықтарының максималды сомасы шегінде жүзеге асырылады:

• ұлттық валютадағы жинақ салымдары бойынша 15 миллион теңгеден аспайды;
• ұлттық валютадағы басқа депозиттер бойынша 10 миллион теңгеден аспайды;
• шетел валютасындағы депозиттер бойынша 5 миллион теңгенің баламасынан аспайды (банктің лицензиясынан айыру күніне белгіленген бағам бойынша).

«Егер AsiaCredit Bank салымшысының түрлері мен валюталары бойынша ерекшеленетін екі немесе одан да көп кепілдендірілген депозиттері болса, әрбір тип бойынша белгіленген лимиттерді ескере отырып, оларға 15 миллион теңгеден аспайтын сомада жиынтық кепілдік өтемақы төлейді», - деп толықтырды KDIF.

Кепілдік өтемақы алу үшін AsiaCredit Bank салымшылары кез-келген банк-агент филиалына хабарласып  немесе eubank.kz сайтында төлем туралы өтініш толтыра алады.

«Өтемақы алу үшін салымшы жеке басын куәландыратын құжатты ұсынуы керек. Егер салымшының орнына басқа адам жүгінсе, онда құқық белгілейтін құжаттар беріледі (мысалы, нотариалды куәландырылған сенімхат немесе мұрагерлік туралы куәлік). Кепілдік өтемақысын төлеу агент-банкке құжаттар келіп түскен күннен бастап бес жұмыс күнінен кешіктірілмей жасалуы керек», - деп атап өтті KDIF.