Ashyq бағдарламасын қолданбайтын қариялар қалай күн көрмек?

Смартфоны жоқ қарт адамдар жеке куәлікпен азық-түлік дүкендері мен дәріханаларға кіре алады.

Бұл туралы Orda.kz хабарлады.

Бұған дейін БАҚ кейбір қарт адамдарда Ashyq қосымшасының жоқтығына байланысты азық -түлік дүкендеріне кіргізілмейтінін жазған.

Алматы қаласының санитарлық-эпидемиологиялық бақылау департаменті азық-түлік дүкендері мен дәріханаларға Ashyq қосымшасы болмаса, жеке куәлікпен кіруге болатынын хабарлады.

- Ashyq жобасында жұмыс істейтін объектілерге смартфондағы мобильді қосымша арқылы кіруге болады, ол болмаған жағдайда объект өкілі жеке куәлік арқылы келушінің мәртебесін «қарауыл» режимінде сканерлейді. Жеке куәліктің көмегімен егде жастағы адамдар Ashyq нысандарына, соның ішінде азық-түлік дүкендеріне, дәріханаларға және басқа да нысандарға кіре алады, - делінген хабарламада.

Алматының санитарлық дәрігерлері қаладағы эпидемиологиялық жағдай күрделене түскенін қосты. Тамыздың соңғы екі аптасында коронавирус жұқтырғандардың 22%-ы егде жастағы адамдар.