Ashyq бағдарламасы адам құқығын бұза ма?

Коронавирусты таратпау жөніндегі ведомствоаралық комиссия Ashyq қосымшасын Қазақстанда енгізу адамдардың құқығын бұза ма, жоқ па деген сұраққа жауап берді.

Бұл туралы Orda.kz хабарлады.

Қазақстандықтар бағдарлама олардың жүріп-тұруларын шектейді деп шағымданды. Оған ведомствоаралық комиссияда «Аshyq бағдарламасы адамдардың құқығын бұзбайды, себебі кәсіпкерлер шешімді өз еріктерімен қабылдады», деп жауап берді.

– Нысан иесі - Ashyq жобасының қатысушысы - келушілердің мәртебесін тексеруге міндеттеледі.

Бүгінгі күні «қызыл» мәртебемен 1236 адам және «сары» мәртебемен 541 адам нысандарға кіруге тырысқаны анықталды, - деп хабарлады комиссия.

Олардың айтуынша, Ashyq, ең алдымен, мекемеге келушіге коронавирусты жұқтырып алмау үшін керек.

Ashyq бағдарламасына қосылған кафелер, мейрамханалар, клубтар және басқа мекемелер, «жұмыс уақыты бойынша жеңілдіктер алады, өйткені қосымша вирус жұқтырған азаматтарды анықтауға мүмкіндік береді».

Егер кәсіпкерлер мекемелерді тексеретін мониторингтік топтардың жұмысына наразы болса, олар Бас прокуратураға шағым түсіре алады. 115 нөміріне хабарласа алады (қоңырау шалу тегін). Сондай-ақ, аймақтарда мобильді топтар тәулік бойы кәсіпкерлікті қорғау мақсатында жұмыс істейді.

Айта кетсек, 13 мамырда Денсаулық сақтау министрлігінің санитарлық-эпидемиологиялық бақылау департаменті Ashyq қазақстандықтарға бір жылға жүру еркіндігін бере алады деп хабарлады. Бірақ бұл әзірге тек жоспарланып жатыр.