Ашуланған «Ордабасы» жанкүйерлері клуб басшылығын сөйлесуге шақырды

«Ордабасы» - «Ақтөбе» матчында  шымкенттік команда 0:1 есебімен жеңіліп қалды, осыдан кейін  әлеуметтік желілерде наразы жанкүйерлердің видеосы тарай бастады.

Ролик авторының  айтуынша, түсірілім  «Ордабасы» мен  «Ақтөбе» матчынан кейін Шымкент стадионының жанында жасалған.

Жанкүйерлер «Ордабасы» басшылығынан әңгімеге шығуын талап етіп, клуб мүшелері мінген автобустың жолын жапқан. Осыдан кейін іске құқық қорғау органдарының араласуына тура келеді. Жағдай бейбіт жолмен шешіліп,  клуб басшылығы ашулы жанкүйерлермен сөйлесіп, жақын арада баспасөз мәслихатын өткізуге уәде берді.

Матч 18 маусым күні Шымкенттегі Қажымұқан Мұңайтпасов атындағы стадионда өтті. Ақтөбеліктер 0:1 есебімен жеңіске жетті. Шымкент қаласының спорт басқармасы жағдайға түсініктеме берді.

— Өкінішке қарай тұрғындардың сүйікті командасы жеңілген сәттерде  мұндай жағдайлар болып тұрады. Бұл әр елде болуы мүмкін, біздің елде де болды. Біздің команда тартысты бәсекеде жеңіліске ұшырады, осыған байланысты жанкүйерлер ашуланып, спортшылардың шығуына кедергі келтірді, - дейді  басқармадағылар.

Футболдан Қазақстан чемпионатының 15 турының қорытындысы бойынша «Ордабасы»  21 ұпаймен алтыншы орында. Енді олар  22 маусымда өтетін матчта елордалық «Астана» командасымен ойнайды. Соңғы ақпарат бойынша, жағдай реттелген. Спортшылар келесі жарыстарға дайындалып жатыр.