Әшімбаев Иран Президентінің инаугурациясына қатысты

Әшімбаев Иран Президентінің инаугурациясына қатысып, бірқатар кездесулер өткізді.

Сенат спикері Мәулен Әшімбаев Иран Ислам Республикасының жаңадан сайланған президенті Масуд Пезешкианды сайлаудағы жеңісімен құттықтап, Қазақстанның одан әрі ынтымақтастыққа мүдделі екенін атап өтті.

«Қазақстан Республикасы Президентінің шын жүректен құттықтауын жеткізуге рұқсат етіңіздер. Иран біздің Каспий аймағындағы көршіміз, Таяу және Орта Шығыстағы маңызды сауда серіктестеріміздің бірі. Сондықтан Иранмен қарым-қатынасты нығайту сыртқы саясатымыздың басым бағыттарының бірі болып қала береді», - деді ҚР парламентінің жоғарғы палатасының төрағасы.

Сонымен қатар сенат төрағасы ирандық тарапқа Шанхай ынтымақтастық ұйымының саммитіне белсенді қатысқаны үшін  ризашылығын білдірді.

Сапар барысында  Мәулен Әшімбаев Исламдық консультативтік кеңестің төрағасы Мохаммад-Багер Ғалибафпен кездесті. 

«Қазақстан парламенті Иранның Исламдық консультативтік кеңесімен байланысты нығайтуға мүдделі. Парламенттерімізде жұмыс істейтін достық топтар парламентаралық ынтымақтастықтың берік негізін құрайды. Біз бұл бағытта тәжірибелік мазмұнға баса назар аудара отырып, екі ел үшін өзекті мәселелерді шешуге көмектесуді көздейміз. Сондай-ақ заңнамалық тәжірибе алмасуды маңызды деп санаймыз», - деді Мәулен Әшімбаев.

Сондай-ақ, Мәулен Әшімбаев Иран Ислам мәдениеті мен байланыстары ұйымының басшысы Мохаммад Мехди Иманипурмен мәдени байланыстарды талқылады.