Қашағандағы мұнай өндірісі  жоспарланған мерзімнен бұрын қайта жанданды

North Caspian Operating Company (NCOC) кен орнында жоспарлы профилактикалық жөндеу жұмыстарының аяқталғанын хабарлады. Ол 1 маусымда басталып, өндіріс толық тоқтатылды.

Жұмыс 45 күнге, яғни 15 шілдеге дейін созылады деп жоспарланған болатын. Алайда бүгін компания кеніштің теңіздегі және құрлықтағы өндірістік нысандарындағы жұмыстардың қазірдің өзінде аяқталғанын ресми түрде хабарлады.

— Бұл профилактикалық қызмет көрсету шаралары NCOC үшін маңызды кезең болып табылады, өйткені олар активтеріміздің тұтастығын, сенімділігін және өндірістік қуатымызды арттыруды қамтамасыз етуге көмектеседі... Мен барлық қатысқандарға: біздің мердігерлерге, акционерлерге және мемлекеттік органдарға алғысымды білдіргім келеді. Осы маңызды жобаны қауіпсіз және сәтті жүзеге асыруға бағытталған қолдауы мен бірлескен күш-жігері үшін рахмет айтамын, - деді NCOC басқарушы директоры Оливье Лазар.

Кен орнында ұңғымалар ашылып, өндірістік жүйелер қалыпты жұмыс режиміне ауыстырылды. Теңіздегі және құрлықтағы өндіріс орындарының жұмысы біртіндеп қалпына келтірілді. Әрі қарай компания мұнай өндіру көлемін арттыруды жоспарлап отыр.