Әсем Алматыда ұлт ырысы – Наурыз мерекесін тойлау басталды

Мерекелік шараға Алматы қаласының әкімі Ерболат Досаев қатысып, Наурыз мейрамының жаңарудың, бейбітшілік пен берекенің нышаны ретіндегі маңызын атап өтті, деп хабарлайды Orda.kz.

Наурыз күнтізбесі бойынша 21 наурыз – Ынтымақ күні. Астана алаңына мыңдаған алматылықтар мен қала қонақтары жиналып, елімізге танамыл өнерпаздардың әндерін тамашалап, әуен ырғағына тербелді.

Алматы алаңы жиналған жұртшылықты «Наурыз құшағында Алматы» атты әдемі атаумен қарсы алды.

Аты аңызға айналған «Дос-Мұқасан» ансамблі, Майра Мұхамедқызы, Жанар Айжанова, Өмірқұл Айниязов, Жазира Байырбекова, Игорь Благородный, Төлеген Рақымбаев, «КешYou» тобы, Диная, AyaFunk және басқа да жұлдыздар сахнада өнер көрсетіп, қала халқын қуантатын болады.

«Жаңа Ғасыр» театрының әртістері, әншілер Мәди Рымбаев пен Әли Оқаповтың орындауындағы әндерге түрлі ұлттардың билерін билеп, көрермендерге көтеріңкі көңіл-күй сыйлады.

Алаңды ұлттық аспаптар күмбіріне бөлеген күйшілер мерекелік көңіл-күйді аспандата түсті.

Концертке жиналғандар қатарында Алматы қаласының әкімі Ерболат Досаев та жұртпен қатар отырып, өнерпаздардың концертін тамашалады.

Концерттен бөлек қолөнершілер ағаш пен саз балшықтан жасаған бұйымдарын ашық аспан астында ұсынып, мерекеге көрік, қуанышқа ерік берді.

Бас сахнаға жақын жерде әсем киіз үйлер қаз-қатар тігіліп, наурыз көже, бауырсақ, балқаймақ сияқты ұлттық тағамдар ұсынды. 

Олармен қатарласа неше түрлі сән мен салтанатқа бөленген ұлттық киімдер көрмесі және суретшілеріміздің көркем туындылары жалғаса тізілген.  

Алматы нағыз көктем мерекесінің астанасына айналып, қала халқы Наурыз мейрамын кең көлемде тойлауды бастап кетті.

Мерекеге арналған әр түрлі шаралар мегаполистің әр ауданы мен негізгі орталықтарында өтеді. Ал Астана алаңы таңнан бері ұлттық нақыш пен небір әсем ұлттық киімнің көрмесіне айналғандай. Мерекелік көңіл-күйге бөленген қала халқы «Ұлыс оң болсын!» деп бір-біріне жарқын тілектерін арнап, жарқылдап тойлап жүр. 

Мерекелік шаралар 23 наурызға дейін жалғасады. Күн сайын кешкі сағат 22:00-ге дейін қонақтар «Жұлдызды Алматы» фестивалі аясындағы әдемі концерттерді, сондай-ақ театрландырылған көріністерді, ұлттық ойындарды, қойылымдарды және қолөнер жәрмеңкелерін тамашалай алады.