Асанәлі Әшімов көлігіндегі нөмірге қатысты дауға жауап берді

Бірер күн бұрын әлеуметтік желіде белгілі актер, абыз ақсақал Асанәлі Әшімовтың көлігінде қалааралық трассада мемлекеттік нөмірдің орнына «ASANALI» деген жазу тұрғаны бейнеленген, көлікті жол полициясы қызметкерлерінің тоқтатқаны бейнеленген бейнежазба тарап кетті. Бұл мәселеге қатысты көпшіліктің ойы екіге жарылған.

Асанәлі Әшімов өзінің көлігіндегі нөмірге қатысты дау туған соң, Ұлттық арнаның «1001 түн» бағдарламасына эксклюзивті пікір берген.

– Құрметті әлеумет! Мен жолдан жаңа ғана келдім. Мынау әлеуметтік желідегі даудың басы – менің көлігімнің нөмірі. Менімен бірге бір-екі түсірілім тобы жүр. Нөмір кино үшін ғана уақытша тағылған. Оны мен ылғи тағып жүрмеймін ғой. Жол тәртібін бұзбасақ, жарты күнге тағуға болады ғой. Жолда түсірдік, көшеде түсірдік. Деректі фильм үшін жасалған әрекет – бұл, - деді актер.

Көпшілік ақсақалды бір ауыз сөзіне тоқтағандай кейіп танытуда. Ал қызылордалық полиция қызметкерлері көлікті нөмірі үшін тоқтатқанын алға тартқан.