Асқар Мамин ҚР Президенті жанындағы Цифрландыруды енгізу мәселелері жөніндегі комиссия отырысын өткізді.
Бұл туралыOrda.kz primeminister.kz сайтына сілтеме жасап хабарлайды.
Комиссия отырысына Цифрлық даму, инновациялар және аэроғарыш өнеркәсібі министрі Бағдат Мусин мен индустрия және инфрақұрылымдық даму бірінші вице-министрі Қайырбек Өскенбаев қатысып, бірыңғай мемлекеттік жылжымайтын мүлік кадастры (БМЖМК) ақпараттық жүйесін құру жөніндегі жұмыс барысы туралы баяндады.
Экология, геология және табиғи ресурстар министрі Серікқали Брекешев ҚР минералдық ресурстарының ұлттық деректер банкін құру жөніндегі жұмыс барысы туралы баяндады.
Отырысқа қатысушылар сондай-ақ 2025 жылға қарай кемінде 100 мың білікті IT-маман даярлау жөніндегі міндеттерді іске асыру мәселелерін қарастырды. Бес жыл ішінде ҚР өңірлерінде 20 инновациялық бағдарламалау мектебін ашу, 50 өңірлік ЖОО-ны IT-компаниялар мен бейінді IT-ЖОО қамқорлығына беру, бағдарламалау мектептеріне 20 мың грант бөлуді жоспарлады.
Үкімет басшысы экономиканы цифрландыру, кадрлар даярлау және IT-саласын дамыту бойынша жоспарланған барлық жобалардың уақтылы және сапалы жүзеге асырылуын қамтамасыз етуді тапсырды.
