Асқар Мамин Гурбангулы Бердымухамедовпен келіссөз жүргізді

Ашхабад қаласына жұмыс сапарымен барған Асқар Мамин Экономикалық ынтымақтастық ұйымының (ЭЫҰ) XV саммитіне қатысты. Сондай-ақ, Түрікменстан Президенті Гурбангулы Бердымухамедовпен келіссөз жүргізді.

Асқар Мамин Экономикалық ынтымақтастық ұйымының саммитінде сөйлеген сөзінде Қазақстанның ЭЫҰ елдерімен жиынтық тауар айналымының биылғы 9 айда 31%-ға $8,2 млрд-қа дейін өскенін атап өтті.

Қазақстан Республикасы премьер-министрінің ресми ақпараттық ресурсының мәліметіне сәйкес, Мамин АӨК саласында бірлескен өндірістік үдерістер құруды, азық-түлік тауарларының өзара саудасында оффтейк келісімшарттарды қолдануды кеңейтуді және басқа да шараларды көздейтін сауда ағындарын арттыру жөніндегі жол картасын және ЭЫҰ азық-түлік қауіпсіздігі бағдарламасын әзірлеуді ұсынды.

– ЭЫҰ кеңістігінде бір-бірімен бәсекелеспейтін, бірін-бірі толықтыратын көліктік транзиттік дәліздерді қалыптастыру елдеріміздің орнықтылығын арттыру мен экономикаларын болашақта дамытудың негізгі шарттарының бірі, - деді А. Мамин.

Айта кетейік, ЭЫҰ саммитіне Түрікменстан Президенті Гурбангулы Бердымухамедов, Әзірбайжан Президенті Ильхам Алиев, Иран Президенті Ибрагим Раиси, Қырғызстан Президенті Садыр Жапаров, Тәжікстан Президенті Эмомали Рахмон, Түркия Президенті Режеп Тайып Ердоған, Өзбекстан Президенті Шавкат Мирзиеев, Пәкістан Президенті Ариф Алви қатысты.