Қаржы министрлігі: онлайн аударымдар салығы тек кәсіпкерлерге тиесілі

Қаржы министрлігі ақша аударымдарын фискалдауға қатысты түсініктеме берді. Құзырлы орган таратқан мәлімет бойынша бұл тек кәсіпкерлік қызмет жүргізетін азаматтарға ғана қатысты, деп хабарлайды ORDA.

«Қазіргі мобильді банктік қосымшалар қолма-қол ақшадан онлайн есеп айырысудың бастамасы болды. Жеке тұлғалардың мұндай аударымдары әкімшілік тұрғысынан бақылануды талап етпейді, әрі салық салу нысанына жатпайды», - деп жазылған министрлік хабарламасында.

Сонымен қатар кей кәсіпкерлер өз қызметтерін жүзеге асыру барысында жеке онлайн-аударымдар үшін банк сервистерін пайдаланып жүр. Салық осындай кәсіпкерлікпен айналысатын азаматтарға салынатын болады, олардың барлық деректері қорытынды есепте көрсетіледі.

«Шағын бизнес субъектілері 2023 жылға дейін табыс салығын төлеуден босатылған. Негізгі жолдардың бірі кәсіпкерлік қызметке арналған жеке шотты пайдалану болып отыр, сол шотқа сатылған тауарлар, жұмыстар мен көрсетілген қызметтер үшін төлемдер түседі», - дейді министрлік.  

Бұған қоса министрлік коммерциялық операцияларды дәлме-дәл анықтай алатын қауіпсіз басқару жүйесін әзірлеуді ұсынады.

Осыған дейін үкімет мобильді қосымшалар арқылы ақша аударымдарын жасайтын бизнеске салық салу мәселесін қарастыруды міндеттеген болатын.

Бүгінде қазақстандық ірі банктердің бірі арқылы клиенттер картаға байланған телефон нөмірі бойынша қолма-қол ақшасыз аударымдар жасауда. Аударым комиссиясыз жүзеге асырылады. Мұндай төлемдер жеке мақсатта, такси, азық-түлік, шаш қию, көлік жуу және басқа төлем ретінде де қолданыла береді.