Арыстанбек Мұхамедиұлы Айсұлтан Сейітовке берген уәдесіне қатысты түсініктеме берді

Қазақстандық режиссер әрі клипмейкер Айсұлтан Сейітов 2019 жылы үкіметте өткен жиында экс-мәдениет және спорт министрі Арыстанбек Мұхамедиұлының оған қалай ақша ұсынғанын айтып берді. Шенеуніктің өзі бұл сөзді жоққа шығарды.

«Отырыста Арыстанбек Мұхамедиұлы бізге 10 млн доллар ұсынды. Ол: «Айсұлтан, 10 млн долларға дейін кез келген жобаны қолдаймыз, мен сенің досың Тимур Смағұловқа үкіметтен орын беремін» деді. Түсінбей қалдық, тура осылай айтты» деді Сейітов «Замандас» подкастының эфирінде.

Бұрынғы Мәдениет және спорт министрі Арыстанбек Мұхамедиұлы кездесудің шынымен де өткенін, бірақ тек бірлескен жобаларды іске қосу мүмкіндігі талқыланғанын алға тартты.

«Сома туралы мәселе көтерілген жоқ. Мен онымен шынымен кездестім, Қазақстан киносының дамуына белсене атсалысуы үшін ынтымақтастық ұсындым. Ол өте талантты, мен оның кино өнерінде дамуына көмектескім келетін. Бірақ мен ақша беремін деген жоқпын, ондай дүниені талқылаудың өзі дұрыс емес» деді ол.

Мұхамедиұлының айтуынша, мұндай жобаларға бюджет қаражатын бөлу Кинематографияны қолдау орталығына жүктелген. Олар сметаны зерттеп, қаржыландыру мәселесін шешеді. Ал министрлік тек тақырыптық жоспарға жауап береді, бірақ ақшаны басқармайды.

«Үкіметтегі орынға қалай уәде берер едім, ол жерде іріктеу критерийлері бар, бұл премьер-министрдің құзыреті. Бір ғана нәрсе, жастармен кездескенде үнемі айтамын: тырыс, еңбек қыл, алға ұмтыл, мүмкіндіктер бар. Мақсаты барларды қолдаймын. Мен сізді министрлікке шақыра аламын, бірақ үкіметке емес» деді экс-министр.

Айсұлтан Сейітов – қазақстандық режиссер, музыкалық бейнережиссер. Нью-Йорк киноакадемиясында режиссерлік білім алған. Hype Production продюсерлік компаниясымен ынтымақтасады. Ол 21 Savage, J. Cole және Offset сияқты рэперлермен жұмыс істеген. Бейне үшін A Lot MTV Video Music Awards номинациясын алды. Сейітов сонымен қатар рэп орындаушысы Канье Уэсттің жаңа альбомының режиссері болған.