Арыстағы өрттен қашқан тұрғындар жан сақтауға тырысуда

«Қазақстан темір жолы»  ұлттық компаниясы Арыс стансасында жүк вагонынан шыққан өрттің алдын ала себебін мәлім етті.

Алдын ала нұсқа бойынша жөнелтуші жүк тиеудің техникалық шарттарын бұзған болуы мүмкн. Сол себепті «ҚТЖ» ҰК» АҚ өз тарапынан апаттың себебін тексеру үшін комиссия құрған.

— Қазақстан контейнері Қазақстан аумағы арқылы Ресейге жөнелтілген, одан әрі Үндістанның Нава-Шева теңіз портына   жеткізілмек болған, - деп түсіндірді ҚТЖ баспасөз қызметі.

ҚТЖ мәліметінше, Түркістан облысындағы  өткел кезекшісі Түлкібас - Арыс учаскесіндегі контейнер өртеніп жатқанын байқап қалған. Бұл жағдай сағат 15:25-те тіркелген.

Ең бастысы Төтенше жағдайлар министрлігі бұған дейін хабарлағандай, қаза болғандар мен зардап шеккендер жоқ. Сағат 19:22 -де өрт сөндірілді.

Оқиға орнында жедел штаб құрылып, жергілікті әкімдік шағын аудан тұрғындарын эвакуациялау туралы шешім қабылдаған.

— Арыс қаласының мыңға жуық халқы бар   Наурыз шағынауданында және  6 мыңға  жуық халқы бар Хлопком кентінде 4 эвакуациялық пункт ұйымдастырылды.

4 мектеп ғимаратында 8 мың орын әзірленді. Эвакуацияланғандардың саны нақтылануда, көбі туыстарының үйін паналап жатыр.

Сағат 20.30-дағы жағдай бойынша, жедел штабтың шұғыл желісіне ақпараттық сипаттағы 2 қоңырау  түсті. Зардап шеккендер туралы ақпарат  жоқ, - делінген ресми мәліметте.