Арыс қаласында оқ жарақатын алған екі ер адамның мәйіті табылды

Қайғылы оқиға 5 тамызда болған. ҚР ІІМ мәліметінше, Түркістан облысы, Арыс қаласында салынып жатқан тұрғын үй аумағына бөтен екі адам кіріп, белгісіз қарудан оқ атқан және анықталмаған бағытта жоғалып кеткен.

«Алған жарақаттарынан үй иесі мен оған құрылысқа көмектесіп жүрген танысы қайтыс болды. Сондай-ақ құрылысқа көмектесіп жүрген тағы екі ер адам оқтан жарақат алған. Олар ауруханаға жеткізілді»  делінген ведомство хабарламасында.

Қазіргі таңда арнайы тергеу-жедел тобы құрылды. «Ұстау» жоспары енгізілді. Күдіктілерді анықтау және ұстау бойынша қажетті шаралар жүргізілуде. Оқиғаның барлық мән-жайы анықталып жатыр.

Ведомство тергеу барысы Түркістан облысының полиция департаменті басшылығының бақылауында екенін атап өтті. Қылмыстық іс жүргізу кодексінің 201-бабы 1-бөлігіне сәйкес сотқа дейінгі тергеп-тексерудің басқа деректері жария етілмейді.