Артық сөзді қысқарту керек - Тоқаев шетелдік жұмысшыларға арналған квоталар туралы

Президент Қасым-Жомарт Тоқаев бизнесмендердің Қазақстандағы шетелдік жұмысшыларға арналған квоталарды кеңейту туралы ұсыныстары дұрыс емес дейді.

Президент елімізде жұмысқа қабілетті азаматтар, әсіресе, жастар жеткілікті деп санайды.

«Мен мына мәселеге ерекше тоқталғым келеді. Жеке кәсіпкерлердің шетелдік жұмысшыларға арналған квоталарды кеңейту идеясын алға тартып жатқанын дұрыс емес деп санаймын. Біз тек тар ауқымда мамандандырылған, елде шынымен тапшы мамандарды ғана тартуымыз керек.  

Біздің қазақстандықтардың жалақысын көтеруді талап етіп, ұқыпты жұмыс істемейтіндіктерін алға тартып, шетелдік жұмыс күшін кіргізу керек деген артық сөзді қысқарту керек. Елде жұмысқа қабілетті азаматтар жеткілікті, әсіресе жастар арасында» деді Тоқаев бизнес өкілдерімен кездесуде.

Президент елде еңбек идеологиясын енгізу міндеті тұрғанын баса айтты.