«АрселорМиттал Теміртау» заңгері пәтерден өлі күйінде табылды

«АрселорМиттал Теміртау» заңгерінің денесі пәтерден өлі күйінде табылды.

«Бүгін сағат 13:01-де Шахтинск қаласындағы Жеңістің 40 жылдығы көшесіндегі 79 үйден өрт шыққаны туралы хабарлама келіп түсті. Бес қабатты тұрғын үйдің бесінші қабатындағы пәтердің жалпы аумағында жиһаздар мен тұрмыстық заттар өртенген. Өрт орнынан 1969 жылы туған әйелдің мәйіті табылды. Төтенше жағдайлар департаменті үйдегі пәтерлерден 9 адамды эвакуациялады. Өрт 13:25-те оқшауланып, 13.31-де толық сөндірілді. Оқиғаның мән-жайы мен өрттің шығу себебі анықталып жатыр» делінген хабарламада.

Компанияның баспасөз қызметі ақпаратты растады және марқұмның отбасына көңіл айтты.

Облыстық полиция департаментінің өкілдері марқұмнның денесінде зорлық белгілері болғанын айтты.

«Марқұм әйелдің денесінде зорлық белгілері болды. Қазіргі уақытта кінәлі адамды және болған оқиғаның мән-жайын анықтау бойынша жедел-іздестіру іс-шаралары жүргізіліп жатыр. Қажет сараптамалар тағайындалды» деп жазылған хабарламада.