АрселорМиттал Теміртау компаниясының өкілі шахтадағы апатқа қатысты пікір білдірді

АрселорМиттал Теміртау АҚ Көмір департаментінің директоры Арман Қалықов Ленин шахтасында болған апатқа қатысты пікір білдірді.

Арман Қалықов газ-дренажды ұңғыманы бұрғылау кезінде зиянды қалдықтардың шыққанын мәлімдеді. 

- Апат кезінде жер астында 106 адам болған. 9 адам зардап шекті, қазір 4 адам ауруханада. 5 адам көз жұмды. Қазір апаттық-құтқару жұмыстары жүріп жатыр. Опат болған жұмысшылардың туыстарына және әріптестерімізге қайғыра көңіл айтамыз, - деді ол. 

Компания өкілінің айтуынша, қайтыс болған жұмысшылардың отбасыларына тиісті көмек көрсетіледі. 

Ал зардап шеккендер Шахтинск орталық ауруханасына жеткізілген. Алдын ала диагноз – метаннан улану. Екі адам токсикология бөліміне ауыстырылса, екі жұмысшы түрлі жарақаттар алған. 

Еске салсақ, бүгін түнде Ленин шахтасында төтенше жағдай болып, 4 жұмысшы көз жұмған. Кейін облыс әкімдігі тағы бір кеншінің мәйіті табылғанын мәлімдеген.