АрселорМиттал Теміртау шахтасында тағы бір оқыс оқиға орын алды

Қарағанды облысында орналасқан АрселорМиттал Теміртау шахтасында жұмысшы әр-түрлі дәрежедегі жарақат алды.

«22 желтоқсанда «Шахтинск» шахтасында 1975 жылы туған тау-кен жұмысшысы металл сынықтарын тиеу жұмыстарын орындау кезінде жарақат алды. Оған уақтылы алғашқы медициналық көмек көрсетіліп, кейін ауруханаға жатқызылды. Өміріне қауіп жоқ. Оқиға тергеліп жатыр» деп хабарлады «АрселорМиттал Теміртау» АҚ баспасөз қызметі.

Жарақат алған тау-кен жұмысшысы профессор Х.Мақажанов атындағы клиникаға жатқызылды. Онда бас миының жарақаты мен денесінің көгеруі бар деп хабарланған.

«Ер адам шұғыл травматология бөлімшесіне жатқызылды. Жағдайы орташа, тұрақты» деп хабарлады Қарағанды облысының денсаулық сақтау басқармасы.

Естеріңізге сала кетейік, осы жылдың қараша айында «Абай» шахтасында метан шығарындыларынан алты адам қаза тапты. Шахтада барлығы 64 жұмысшы болды. 56 адам бірден өзін-өзі эвакуациялады. Сондай-ақ ТЖ салдарынан екі кенші зардап шекті. Кейін қаза тапқан кеншілердің отбасыларына он жылдық ақшалай қаражат төленетіні хабарланды.