Арон Атабек комаға түсті

Азаматтық белсенді Айсұлу Әбубәкірова диссидент ақын және бұрынғы саяси тұтқын Арон Атабек комаға түскені туралы ақпаратты растады.

Бұл туралы Orda.kz хабарлайды.

Orda.kz ақынның жағдайы нашарлағанын және оның жансақтау бөлімінде екенін хабарлаған болатын.

– Кеше сағат онға жуық ол реанимацияға түсті. Содан кейін таңертең ол комаға түсті, – деді белсенді.

Алматы қаласының қоғамдық денсаулық сақтау басқармасы Арон Атабектің қалалық ауруханаларда емделмегенін хабарлады. Басқарма оның жеке клиникада екені туралы болжам айтты.

Еске салсақ, 1 қазан күні Павлодар қаласының №2 соты Арон Атабектің денсаулығына байланысты жазасын жеңілдету жөнінде түрме әкімшілігі тарапынан берілген өтінішті қанағаттандырды. Сот мәліметінше дәрігерлер Арон Атабектің дауасыз сырқатқа (омыртқа шеміршегінің зақымы) ұшырағанын растаған.

Әйгілі диссидент ақын 2006 жылы «Шаңырақ» оқиғасынан кейін 18 жылға бас бостандығынан айрылып, оның 15 жылын өтеп болған. Дегенмен бір апта бұрын оның сырқаты меңдеп, ауруханаға түскен.

Құқық қорғаушылар Арон Атабекті саяси тұтқын деп таныған. Ең алдымен оның  денсаулығына байланысты халық алаңдаушылығына себеп болған Қазақстандағы Ұлттық алдын алу тетігі (ҰААТ) қатысушылары болды. Олар түрмедегі ақынның  жағдайының нашарлығын алғаш айтып, пікірталастарға түрткі болды.