Арнайы әскери операцияға үлес қосу үшін келдім – «Вагнердің» қазақ сарбазы

Соғысқа ұрланғаны туралы туыстары хабарлаған Марғұлан Бекенов Ресейдің «арнайы операциясына» үлес қосуды ұйғарғаны туралы бейнехабарлама арқылы үндеу жасады.

Видеоны бірнеше ресейлік telegram-арналар жариялады.

«Бұқаралық ақпарат құралдарында мені, Томск мемлекеттік университетінің студентін ұрлап әкетті деген ақпарат шықты. Сірә, анамның қобалжып, мені бұл жерден қалай болса да алып кеткісі келгендігінен осындай әрекеті болған шығар.

Мен өз еркіммен Вагнерге, яғни әскери компанияға жігіттермен бірге соғысу, арнайы әскери операцияға үлес қосу үшін келдім. Мен өзімді тамаша сезінемін, команда керемет, мен өзімді таптым. Маған бұл жер ұнайды. Психикалық және эмоционалды түрде жақсымын. Тағы да қайталаймын, мені ешкім ұрлаған жоқ», — деді Бекенов.

Еске салайық, Қазақстанның қылмыстық кодексіне сәйкес, шетелдегі қарулы қақтығыстарға қатысқан азамат бес жылдан тоғыз жылға дейін бас бостандығынан айырылады.