Армения-Әзірбайжан шекарасындағы қақтығыстар жалғасуда

Армения-Әзірбайжан шекарасындағы қақтығыстардың  тоқтайтын түрі жоқ. Бір күн бұрын шекарада оқ атылды, жараланғандар бар.

«Армения қарулы күштері Әзірбайжан армиясының позицияларына оқ жаудырды» деп хабарлады Әзірбайжан қорғаныс министрлігі. Армения да дәл осындай мәлімдеме жасады.

Day.Az агенттігінің хабарлауынша, 23 қыркүйекте Армения-Әзірбайжан шекарасында сағат 19:30-дан 23:40-қа дейін атыс болған. Әзірбайжан Қорғаныс министрлігінің хабарлауынша, Армения қарулы күштерінің бөлімдері Юхара, Шоржа, Басаркечер облысы және Джермук елді мекендер бағытында орналасқан Әзірбайжан армиясы позицияларына  оқтын-оқтын оқ жаудырған.

«Атыс нәтижесінде Әзірбайжан армиясының әскери қызметшілері Амануллаев Рашад Агаджан оглы, Рахимзаде Рухид Октай оглы және Джадов Раван Шамсаддин оглы жарақат алды. Жаралыларға дереу алғашқы медициналық көмек көрсетілді. Олардың өміріне қауіп төніп тұрған жоқ. Көрсетілген бағыттар бойынша орналасқан Әзірбайжан армиясының бөлімдері тиісті шаралар қабылдады. Оқиға үшін барлық жауапкершілік жағдайды мақсатты түрде ушықтыратын Арменияның әскери-саяси басшылығына жүктелетінін мәлімдейміз» деді министрлік.

Осы орайда Армения Қорғаныс министрлігі Әзірбайжан қарулы күштерінің бір бөлімшесінің армян-әзірбайжан шекарасының шығыс бағытында орналасқан армян жауынгерлік позицияларының біріне енуге әрекеттеніп, арандатуға барғанын хабарлады.

NEWS.am сайтының хабарлауынша, Армения қарулы күштері бөлімшелері әрекетінің арқасында жау кері қайтарылды. Армения тарапынан шығын жоқ. Түнде басқа оқиға болған жоқ. 24 қыркүйек күні сағат 10.00-дегі жағдай бойынша жағдай салыстырмалы түрде тұрақты.

Еске салайық, екі мемлекет арасындағы қақтығыстың ушығуы бір жарым апта бұрын басталған. Екі тарап бірін-бірі арандатушылық әрекеттерге барды, оқ жаудырды деп айыптауда.