Армения Ресей газ бағасын көтерсе, ҰҚШҰ мен ЕАЭО-дан шығатынын мәлімдеді

Армения парламентінің спикері Ален Симонян Ресей республикаға жеткізілетін газ бағасын көтеру туралы шешім қабылдаса, Ереван ҰҚШҰ мен ЕАЭО-дан шығатынын айтты, деп хабарлайды Orda.kz ресейлік БАҚ-тарға сілтеп. 

Алайда оның пікірінше, бұндай жағдайға жете қоймайды.

«Мұндай әңгімелер, мысалы, тауар бағасына немесе газ бағасына қатысты мәселелер көп жылдан бері талқыланып келеді. Айта кетуім керек, егер Ресей Армения үшін газ бағасын көтеру туралы шешім шығарса, Армения да өз шешімін қабылдап, ҰҚШҰ-дан да, ЕАЭО-дан да және басқа да құрылымдардан түбегейлі шығады. Бірақ менің ойымша, бұл жағдайға жетпейді, өйткені осыдан кейін екі ел басшылары арасында өте жақсы, жұмысқа бағытталған әрі тиімді әңгіме болды», — деді Ален Симонян брифинг барысында.

Парламент спикерінің айтуынша, мұндай әңгімелер ел басшыларының ашық кездесулерінде жиі айтыла бермейді.

«Бұл — үдеріс, келіссөздер, оның ішінде оң тұстары да бар. Мен бұрын да айттым және тағы да қайталаймын, біз Ресейге қарсы ештеңе істеген жоқпыз және ештеңе істемейміз де. Бірақ сонымен бірге Арменияның мүддесін қорғадық және қорғай береміз», — деді ол. 

Еске салсақ, брифинг барысында ол  Мәскеуде өткен Ресей президенті Владимир Путин мен Армения премьер-министрі Никол Пашинянның кездесуі туралы сұраққа жауап берген болатын.

Оқи отырыңыз:

• Ресей Қазақстанның мұнайын Қара теңізге жөнелтуге ресми түрде рұқсат берді
• Ресей Үкіметі: жаңа Конституция Қазақстан мемлекетінің іргесін нығайта түседі
• Үндістан Ресей мұнайын сатып алмауға уәде берді, Трамп оларға баж салығын төмендетті
• Ресей Қазақстандағы мұнай кен орындарын игеруге жиі қатысатын болады