Армения мен Әзірбайжан арасындағы соғысқа  Ресей қару-жарақ тасыды

Әзірбайжан президенті Ильхам Әлиев елдер арасындағы 44 күндік соғыс кезінде Арменияға қару-жарақ Ресейден Қазақстан, Түркіменстан және Иран арқылы жеткізілгенін айтты.

Әлиев ADA университетінде өткен «Оңтүстік Кавказ: даму және ынтымақтастық» атты халықаралық конференцияда осындай мәлімдеме жасады. Әзірбайжан президенті өз елінің жауының қаруды қайдан алғанын және оның қалай болғанын білетінін түсіндірді. Әңгіме Әзірбайжан мен Армения арасындағы Таулы Қарабақтағы даулы аумақтарға байланысты 44 күнге созылған әскери қақтығыс туралы болып отыр. Оның үстіне, оның айтуынша, кейбір елдер, соның ішінде Қазақстан да өз аумақтары арқылы қару-жарақ тасымалдауға қарсы болған жоқ.

 «Біз бұл бағытты қадағаладық - ол Ростов пен Моздоктан өтті. Біз грузин достарымыздан әуе кеңістігін жабуды сұрадық, олар мұны істеді. Бұл ретте біз олардан Грузия аумағы арқылы Ресейден Арменияға қару-жарақ тасымалданбауын сұрадық. Олар құрлықтағы шекараларды да жауып тастады. Біз Каспий жағалауы елдеріне Арменияға қаруы бар ресейлік жүк ұшақтарының өз аумақтары арқылы ұшуына тыйым салу туралы хат жолдадық. Осы орайда Қазақстанға, Түрікменстанға, Иранға бет бұрдық. Бірақ, өкінішке орай, бұл аумақтар Арменияға қару-жарақ тасымалдау үшін пайдаланылған»  деп келтіреді Әлиевтің сөзін Oxu.az.

Оның айтуынша, соғыстың 44 күнінде Ресейден Арменияға қару-жарақ жүк ұшағымен жүйелі түрде жеткізіліп тұрған. Айта кетейік, өткен аптада Таулы Қарабақтағы шиеленіс күшейген болатын. Тараптар бір-бірін байланыс сызығын бұзып, оқ жаудырды деп айыптады. Ұзаққа созылған қақтығыстың келесі раунды 2020 жылдың қыркүйек айының соңында болды. Тараптар бірнеше рет бітімге келуге тырысты, бірақ 10 қарашаға қараған түні жасалған үшжақты келісім сәтті аяқталды. Әзірге даулы аймақта ресейлік бітімгершілік күштері бар.