Арман Шораевқа қарсы қылмыстық іс қозғалды

Қоғам қайраткері Арман Шораев Астанада әйел сабады деген күдікке ілінді.

Бұл туралы елордалық полиция департаменті растады.

«Денсаулыққа зақым келтіру фактісі бойынша А.Ш. серіктесіне қатысты сотқа дейінгі тергеу басталды. Қажетті сараптамалар тағайындалды. Қазіргі уақытта барлық мән-жай анықталуда» деп жауап берді полиция департаментінің баспасөз қызметі.

Бұған дейін журналист Михаил Козачков ер адамның көшеде әйелді ұрып жатқаны түсірілген видеоны жариялаған болатын. Ол бейнежазбада белгілі қоғам қайраткері Арман Шораев бейнеленгенін алға тартады.

Шораевтың өзі Facebook желісінде «жасанды интеллектің құрбаны болғанын» және журналистке қарсы арыз түсіретінін мәлімдеді.