Қарлы боран салдарынан еліміздің бес облысында жолдар жабылды

Солтүстік және батыс облыстарда  бұрқасын, көктайғақ, желдің күшейе түсу қаупі бар.

Қазақстанда сенбі күні ауа райының қолайсыздығына байланысты еліміздің бес облысында жолдар жабылды, деп хабарлады республиканың Төтенше жағдайлар министрлігі.

«Қазавтожол» ҰҚ» АҚ-ның  хабарлауынша, ауа райының нашарлауына байланысты (көктайғақ, қарлы боран, көрінудің шектелуі) бес облыста: Ақмола, Қарағанды, Қостанай, Павлодар, Батыс Қазақстан облыстарында республикалық және облыстық маңызы бар жолдарда көлік қозғалысы жабылды.

«Қазгидромет» РМК мәліметіне сәйкес, өңірлерде бұрқасын, көктайғақ, кей жерлерде жел 15-20 м/с күшейеді.

Нұр-Сұлтанда да боран соғып тұр. Ауа райының нашарлауына және көру мүмкіндігінің шектелуіне байланысты елордадан төрт бағытта – Қарағанды, Көкшетау, Қостанай және Павлодар бойынша шығу шектелді.

«Қауіпсіздік мақсатында тұрғындарды айналма жолдарды пайдаланбауға шақырамыз, өйткені олар қар басып, қауіпсіздікті қамтамасыз етпейді», - деді қала комендатурасы.

Елордада таңнан бері 25 жол-көлік оқиғасы тіркелді.

Төтенше жағдайлар министрлігі азаматтарды ауа-райының өзгеруін бақылауға және дауылды ескерту хабарламаларын назардан тыс қалдырмауға шақырады.

Қыста елді мекендер арасындағы жолдарға сапарды жоспарламас бұрын, алдағы бағыттың ауа райы болжамын зерделеу қажет, деп еске салды Төтенше жағдайлар министрлігі.