«Арлан» арнайы бөлімшесінің сарбаздары сотталды

Көкшетауда «Арлан» арнайы бөлімшесінің бұрынғы қызметкерлері бұзақылық және адам ұрлау ісі бойынша сотталды, деп хабарлайды Orda.kz.

Сот олардың әрқайсысын екі жылдан екі жарым жылға дейін бас бостандығын шектеу жазасына кесті.

Көкшетау қаласының судьясы Назгүл Ұстажанова төрт экс-полицейді алдын ала келісіп, бұзақылық және адам ұрлау әрекеттерін жасағаны үшін кінәлі деп таныды. Сотталғандарға пробациялық бақылау белгіленіп, екі жылдан екі жарым жылға дейін бас бостандығын шектеу жазасы тағайындалды.

Сонымен қатар, олар жәбірленушілерге 1,8 миллион теңге көлемінде моральдық өтемақы мен заң қызметтеріне кеткен шығындарды төлеуге міндеттелді.

2024 жылдың мамыр айында Көкшетау тұрғыны ел президенті Қасым-Жомарт Тоқаевқа бейнеүндеу жолдады. Ол полиция қызметкерлерінің еш себепсіз онкологиялық дертке шалдыққан ағаларын ұрып-соққанын мәлімдеді. Әлеуметтік желілерде тараған бейнежазбадан кейін тергеу басталып, оқиғаға «Арлан» арнайы бөлімшесінің қызметкерлерінің қатысы бары анықталды.

Сот-медициналық сараптама нәтижесі жәбірленушілердің жеңіл дене жарақатын алғанын көрсетті. Олардың денесінде көгерген жерлер мен сырылған жарақаттар анықталды, сондай-ақ бір ағасының миы шайқалғаны тіркелді.