Қарин жазықсыз өлгендер үшін кім жауап беретінін айтты

Мемлекеттік хатшы Ерлан Қарин Qasqa Jol ютуб арнасына сұхбат берді. Сұхбатта қаңтар айында Маңғыстауда басталған митинг, Алматы мен өзге де қалаларда әскерилер қолынан қаза тапқан бейбіт тұрғындар туралы айтылды.

Ерлан Қарин «ескертусіз оқ ату бұйрығына» байланысты жазықсыз қаза тапқандар үшін кім жауап беретіні туралы пікір білдірді.

– Жазықсыз қаза тапқандардың қаны ең алдымен осы оқиғаларды осындай бағытта дамуға, қарулы қақтығыстарға жол ашқан, қару таратқан күштердің мойнында. Оқиғалар толқын-толқынмен дамып отырды. 2 мыңға жуық қару-жарақ ұрланды, қазірдің өзінде іздестіріліп жатыр. Тергеу барысында бұл оқиғалардың қалай ұйымдастырылғаны анықталады, - деді ол.

Мемлекеттік хатшы бейбіт жиынға қатысқан тұрғындарға қару қолданылмағанын баса айтты.

– Полиция алғашқы күндері арнаулы құралдарды пайдаланды. Көпшілік бейбіт жиынға қатысушыларға неге қару қолданды деп жатады. Бейбіт жиынға қатысқандарға ешқандай қару қолданылмады. Ақтауда 15 мыңға жуық адам жиналып тұрды. Бірақ ол жерде азаматтардың саналы әрекеттерінің арқасында ешқандай қақтығыс болмады. Ол жерде жаппай тәртіпсіздікке жол берілген жоқ. Басқа өңірлерде бейбіт жиындарды жаппай тәртіпсіздікке жалғастырып, арандатушылық жасады, - деді Қарин.