Ардақ Назаров не себепті парламентте анасын құттықтағанын айтты

Анасын парламентте құттықтаған депутат Ардақ Назаров әрекетін түсіндіріп, жазба жариялады, деп хабарлайды Orda.kz.

Парламент мінберінен анасына туған күнінетілегін арнаған депутат әлеуметтік желіде сынның астында қалды. Алайда депутат бұл әрекетін ата-анаға деген құрметтің маңызын ұрпақ санасына сіңіру ниетімен жасағанын айтты.

«Анасын туған күнімен құттықтады деп дау шығарып жатқандарға жол болсын. Кеше ғана әкесін қан-жоса етіп тепкілеп, боқтаған баланың бейнежазбасын көрдік. Бұл — жүректі ауыртатын жағдай. Ертең оны көрген жас ұрпақ қайталамасына кім кепіл?» – деді депутат.

Ол қазіргі қоғамда жастар арасындағы қатыгездік, ажырасу, тастанды балалар мен балалар үйіндегі қазақ балаларының көбеюі  басты трагедияға айналғанын айтты.

«Балалар үйінде 2004 жылдан бері тәлім-тәрбие беру ісіне араласып келемін. Жақында ғана 52 бала қалды деп қуанған едік. Соңғы екі жылда бұл сан 158-ге жетті. Басым бөлігі – қаракөз қазақ балалары. Ата-анасы тірі, бірақ ішімдік пен есірткінің құрбаны болғандар», – деп алаңдаушылық білдірді ол.

Осы орайда айта кетейік, кеше ғана мәжіліс депутаты Ардақ Назаров ресми отырыс кезінде анасын туған күнімен құттықтады. Назаровтың бұл әрекеті жұртшылықтың назарынан тыс қалмады. Әлеуметтік желіде көпшілік депутатты сынап, ол жердің құттықтау жолдайтын емес, ресми заң шығарып, сауал тастайтын орын екенін жазды.