Ардагерлер министрді не үшін отставкаға кетсін деп талап етті?

Еңбек және халықты әлеуметтік қорғау министрі Светлана Жақыпова тәжік-ауған шекарасындағы ұрыс қимылдарына және басқа да әскери қақтығыстарға қатысқандарға қатысты шыққан жанжал туралы өз көзқарасымен бөлісті, деп хабарлайды Orda.kz.

Оның айтуынша, ешқандай жанжал жоқ, барлығы ақпаратты дұрыс түсінбеуден болып отыр екен.

Еске салайық, 29 қазанда Астанада тәжік-ауған шекарасындағы 50-ден астам жауынгерлік іс-қимылға қатысқан ардагерлер Еңбек және халықты әлеуметтік қорғау министрі Светлана Жақыпованың бастамаларын талқылауға жиналды. 

Ардагерлер оның бітімгершілік миссияларына қатысушыларды жауынгерлермен теңестіру туралы ұсынысына наразылық білдірді. Олар бұл заңға қайшы әрі  олардың мәртебесі мен жеңілдіктерін төмендетуі мүмкін деп санайтындарын мәлімдеді.

Қауымдастық төрағасы Мұрат Мұхаметжанов түзетулер олардың қатысуынсыз енгізілгенін айтып, министрдің отставкаға кетуін талап етті. Оның айтуынша, министр ханым Ауған соғысына қатысқан күйеуінің мүддесін жақтап жүр екен. 

1 қарашада Светлана Жақыпова журналистермен кездесіп, жағдайға өз көзқарасын білдірді. Оның айтуынша, Ауғанстан соғыс ардагерлері мен мүгедектері одағы оны өз форумдарына қатысуға шақырыпты.

«Мен ол жиынға қатыстым. Тиісінше, олар өздерінің кестелерін дайындады және осы кесте арқылы мен деректерді жаңарту және жеке қайшылықтарды жою қажеттілігі туралы жеке түсініктеме бердім. Бүгінде бітімгершілік туралы заңға қарасаңыз, 4-баптың «Бітімгершілікті сақтаудың негізгі қағидаттары» 5-тармақшасында бітімгершілік әскери қимылдарға қатыспайды деп жазылған. Енді «Ардагерлер туралы» Заңды ашсаңыз, 8 санат бар, ал 6-санат – соғыс ардагерлері қатарына арнайы әскери қызметкерлер кіреді деген жеке бапты көресіз. Біз ешкімнің құқығын таптамаймыз, төлемдерден ешкім ұтылмайды», - деп түсіндірді министр. 

Бүгінде ауған жауынгерлері Әлеуметтік кодекстің 194-бабына сәйкес 22 мың теңге, яғни  – 6,19 АЕК көлемінде төлем алады. Ал тәжік-ауған шекарасында қызмет еткен ардагерлер 4,8 АЕК алады – бұл шамамен 17 мың.

«Ол жерде мен Ұлы Отан соғысы ардагерлері азайып бара жатқанын, сондықтан 1-ші санатты көтеріп, теңестіру керек екенін және бұл ардагерлерді жауынгер санатына теңестіріп, төлемдерін көбейту керектігін айттым. Енді, егер әлеуметтік желілерде мен мұны жаңадан ойлап тапқандай көрсетсе, мен Қаржы министрлігіне жіберген республикалық бюджеттік өтінімнің шығыс құжатының нөмірін бере аламын. Онда барлық санаттар сипатталған және қажеттіліктердің толық есебі бар. Қазір нақты есімде жоқ, бірақ мұның бәрін жасауға шамамен 44 миллиард теңге қажет болды. Мен осындай өтініш бердім, форумда сөйлеген сөзімде мен өтініш бергенімізді айттым, бірақ Қаржы министрлігі бюджеттік шектеулерге байланысты оны қабылдамады, сонымен мәселе жабылды. Дегенмен мен күтпеген жерден осы түсініспеушілікке  қатысты даудың астында қалдым», - деп ақталды Жақыпова

Мәжілісте өткен отырыста үш жылдық бюджет жобасы мақұлданды, бұл алдағы үш жылда ардагерлерге төленетін төлемдер көбейеді деген сөз емес. Светлана Жақыпова түзетулер тек экономикалық жағдай жақсарғанда ғана мүмкін болатынын растады.

Жақыпова отставкаға кету туралы талаптарға жауап ретінде ардагерлер өкілдерімен кездесіп, өзгерістер төлемдерді қысқартусыз көбейтуге ғана әсер ететінін түсіндіруге дайын екенін мәлімдеді.

«Мен бұған қарсы емеспін, әркім өз пікірін айта алады (отставканы талап ету – ред). Бұл әрбір қазақстандықтың құқығы. Бірақ мен ақпаратты талқылау мен ұсыну тұрғысынан дұрыс болғанын қалаймын. Осы маңызды», - деп түйіндеді Еңбек министрлігінің басшысы.