«Арандатуға жол бермеңдер»: Тоқаев ұшақ апатына қатысты шұғыл тапсырма берді

Тоқаев Ақтау маңында болған ұшақ апатынан Қазақстан азаматтары да қаза тапқанына тоқталып, марқұмдардың отбасы мен жақындарына тағы да көңіл айтты. Сондай-ақ арандатуға жол бермеу және құтқаруға атсалысқан азаматтарды марапаттау туралы тапсырма берді, деп хабарлайды Orda.kz.

Қасым-Жомарт Тоқаев құтқару жұмыстарына қатысты шұғыл әрекет еткендеріне тоқтала кетті.

«Апаттың салдары бұдан да ауыр болуы мүмкін еді. Біз бұған жол берген жоқпыз. Адам өмірін сақтап қалдық. Құтқару жұмыстары жоғары деңгейде жүргізілді. Қажетті ақпарат барлығы жұртшылыққа уақытылы беріліп тұрды. Яғни, оқиға бойынша толыққанды мәлімет бәріне бірдей берілді. Азаматтарымыз алғашқы минуттан бастап зардап шеккендерге көмек қолын созды. Халқымыз жанашырлық, ұйымшылдық  және шынайы тілеулестік қасиетін көрсетті. Жұрт кезекке тұрып, қан тапсырды. Әзірбайжан елшілігі ғимаратына гүл шоқтарын қойды. Бұл туралы еліміздің және шетелдің бұқаралық ақпарат құралдары жан-жақты мәлімет таратты. Құтқарушылардың, дәрігерлердің және волонтерлердің адал қызметіне күллі әлем куә болды. Әсіресе, көршілес әрі серіктес елдер – Әзірбайжан, Ресей, Қырғызстан азаматтары айрықша алғыс білдіріп жатыр», – деді мемлекет басшысы.

Сонымен қатар президент Үкіметке апат салдарын жоюға атсалысқан адамдардың ерлігі мен еңбегін лайықты атап өту, ерекше көзге түскен азаматтарды мемлекеттік наградаға ұсыну жөнінде тапсырма берді.

Тағы бір тапсырмасы — Үкіметтік комиссияға зардап шеккен шетел азаматтарына қажетті медициналық және психологиялық тұрғыдан толық көмек беру және қайтыс болған Қазақстан азаматтарының туған-туыстарына айрықша қамқорлық көрсету туралы тапсырмалар да болды.

Үкіметтік комиссия мен Бас прокуратураға басқа құзыретті органдармен бірлесіп, ұшақ апатына жан-жақты әрі объективті тергеу жүргізу міндеті жүктелді.

Президенттің пікірінше, бұл ретте ақпараттық арандату мен фейкке жол бермеу маңызды. Бұдан бөлек, Қасым-Жомарт Тоқаев еліміздегі авиациялық қауіпсіздіктің жай-күйін мұқият тексеру қажет екенін мәлімдеді.