Арал теңізінің түбіне 15 мың гектар сексеуіл отырғызылады

2025 жылы Арал теңізінің құрғап қалған табанындағы 100 мың гектар жерді желектендіру жұмыстары жүргізіледі, деп хабарлайды Orda.kz.

Қызылорда облыстық табиғи ресурстар және табиғатты пайдалану басқармасының мәліметінше, бұл жұмыстарға 15 мың гектарға сексеуіл көшеттерін отырғызу және 85 мың гектарға галофит тұқымдарын себу кіреді.

«Облыс аумағында 7,3 миллион гектар жер мемлекеттік орман қорына кіреді. Оның 3,8 миллион гектары - орманды алқаптар. Орман қорының санитарлық жағдайын бақылау үшін көктем және күз айларында 376,3 мың гектарға орман патологиялық зерттеу жүргізіледі, деп хабарлады басқарма басшысының орынбасары Марип Ақбар.

Дүниежүзілік банктің қаражатына Қазалы ауданында 33,5 мың гектар алқапта сексеуіл және жапырақты ағаштар көшеттерін дайындау үшін тұрақты орман питомнигі құрылды.

Естеріңізге сала кетейік, 2021 жылы мемлекет басшысының тапсырмасымен 1,1 млн гектар алқапқа сексеуіл отырғызу жұмыстары басталды. 
Соңғы төрт жылда Арал теңізінің құрғап қалған түбінде 475 мың гектар алқапта отырғызу мен егу жұмыстары жүргізілді.