«Арай-НС» ЖШС компаниясы мемлекетке 11 млн өтемақы төлейтін болды

«Арай-НС» ЖШС компаниясы мемлекет пайдасына 11 млн теңгеден астам өтемақы төлейтін болды.

Бұл туралы Бейнеу аудандық прокуратурасы хабарлады.

Тұрғын үй-коммуналды шаруашылық бөлімі мен «Арай-НС» ЖШС арасында Бейнеу ауылында газ құбырының құрылысына байланысты мемлекеттік сатып алу жөнінде келісім жасалған. Алайда, мердігер өз міндеттемелерін келісімшартта белгіленген мерзімде орындаған жоқ.

Прокурордың талап арызы бойынша Маңғыстау облысының мамандандырылған ауданаралық экономикалық соты «Арай-НС» ЖШС мемлекеттік сатып алудың жосықсыз қатысушысы деп танып, мемлекет пайдасына 11 млн теңгеден астам өтемақы төлейтін шешім шығарды.

Жауапты лауазымды тұлғалар тәртіптік жауапқа тартылды. 

«Кінәлі лауазымды тұлғалар тәртіптік жауаптылыққа тартылды. Мемлекеттік сатып алу саласындағы ашықтық пен заңдылықты сақтауды қамтамасыз ету бойынша жұмыс жалғасып жатыр», — деді Маңғыстау облысы прокуратурасының баспасөз қызметі.