Қарағандыда улану салдарынан бір бала қайтыс болды

Қарағандыда улану салдарынан бір бала қайтыс болып, алтауы жансақтау бөлімінде жатыр.

Бұл туралы Қарағанды ​​облысы әкімінің баспасөз қызметі хабарлайды.

«Қарағанды ​​облысындағы балаларға арнаулы әлеуметтік қызмет көрсету орталығында 30 шілдеде екі бала өзін нашар сезінді. Оларда құсу және сұйық нәжіс болды. Осы мекеменің тағы 10 баласы 31 шілдеде осындай белгілермен ауруханаға түскен. Дәрігерлер қанша тырысқанымен бір баланы аман алып қалу мүмкін болмады. Қазір алты бала жансақтау бөлімінде жатыр. Қалғандары дәрігерлердің бақылауында» делінген хабарламада.

Жергілікті биліктің хабарлауынша, аурухананы облыс әкімі Ермағанбет Бөлекпаев аралап, денсаулық сақтау басқармасының басшылығы мен емдеуші дәрігерлердің қатысуымен жедел кеңес өткізді.

«Оқиғаның себебін анықтау үшін арнайы комиссия құрылды. Қылмыстық іс қозғалып, Қарағанды ​​облысының арнайы прокурорларының басшылығына берілді. Ермағанбет Бөлекпаев тергеу барысында жауапты тұлғалар анықталып, заң аясында жазаланатынын атап өтті. Мекеме директорының міндетін атқарушы қызметінен босатылды» деп толықтырды облыс әкімдігі.