Қарағандылықтар қантқа таласып, жаға жыртысты

Қарағандыдағы супермаркеттердің бірінде тұрғындар қантқа таласып, жаға жыртысуға дейін барды. Куәгерлердің оқиға орнынан түсірген видеосы желіде қызу талқыға түсті.

Видеодан сөреге қойған қантты тұрғындар бірнеше секундта алып кеткенін көруге болады. Талас кезінде дүкендегі бірнеше тауар зақымдалған.

Еске салсақ, өткен аптада осындай қантқа таластардың бірінде дүкенге полицейлерді шақыруға тура келген. Ол кезде сатып алушылар нормадан көп қант алмақшы болған.

Жауапты органдардың айтуынша, ай басынан бері 740 тонна қант әкелінген, 1300 тонна келе жатыр.

«Тұрғындарды бірінші кезекте байбалам салмауға және қантты қажет болмаса, көп мөлшерде сатып алмауға шақырамыз. Өз кезегінде біздің тарапымыздан әлеуметтік маңызы бар тауарлардың бағасы негізсіз өсіп кетпеуі үшін жұмыстар жүргізіледі» деді Қарағанды қаласы ауыл шаруашылығы және кәсіпкерлік бөлімінің басшысы Абзал Рахымбаев.