Қарағандыда қызметкерлеріне балағат сөз айтқан шенеунік жауапқа тартылды

Қарағандыда облыстық жедел жәрдем стансасы директорының орынбасары Арман Байсұлтан сөгіс түріндегі тәртіптік жаза алды. Оның үстінен қарамағындағы қызметкерлері шағымданды. Шенеунік қызметтік этиканы сақтамағаны үшін жазаланды.

Шенеуніктің үстінен ұжымдық шағымды облыстық жедел жәрдем стансасының жедел бөлімінің қызметкерлері жазған. Олар Қарағанды ​​облысының денсаулық сақтау басқармасына және еңбек инспекциясы басқармасына шағым жолдаған. Оны әлеуметтік желіде де таратқан.

«Директордың орынбасары Байсұлтан Арман ұжымда жүйке жұқартатын ахуал туғызуда. Ол бізге айғайлап, дөрекі сөздер айтып, үнемі дауысын көтереді. Біз оның жедел жәрдем қызметкерлеріне деген ұятсыз көзқарасы туралы бұған дейін Денсаулық сақтау басқармасына шағымданған болатынбыз. Ол бізге қайда шағымдансаң - сонда шағымдан дейді! Бізге тек қоғамдық наразылық көмектесе алады!» деді жедел жәрдем қызметкерлері үндеуінде.

Сондай-ақ, дәрігерлер биылғы жылдың тамыз айынан бастап жаңа есепшінің келуімен олардың жалақылары айтарлықтай қысқартылатынын айтты. Жедел жәрдем қызметкерлері жағдайды түсіндіріп, тәкаппар бастықтан қорғауды сұрайды.

Қарағанды ​​облысының денсаулық сақтау басқармасының баспасөз қызметі жағдайға қатысты түсініктеме берді. Ведомствода қызметкерлердің шағымы бойынша қызметтік тексеру басталғанын атап өтті.

«Жедел жәрдем тобынан келіп түскен шағым фактісі бойынша Қарағанды ​​облысының денсаулық сақтау басқармасы Жедел жәрдем басшысының орынбасары А. Байсұлтанға қатысты этика және деонтология нормаларын сақтау бойынша қызметтік тексеру жүргізіп жатқанын хабарлаймыз. Бүгін тәртіптік кеңес өтті. Үндеуде көрсетілген өзге де фактілер бойынша қызметтік тергеу жалғасуда» деп хабарлады басқарма өкілдері.

Айта кетсек, шенеунік 2019 жылы тағы бір жанжал кейіпкері болған. Ол жолда көлік жүргізушісімен төбелесіп қалған. Жолдағы төбелесті куәгерлер видеоға түсіріп, әлеуметтік желіде жариялаған.