Қарағандыда «тарзанканы» ұйымдастырушылар 8 жылға сотталуы мүмкін

Полиция Қарағандыда 33 жастағы әйелдің өліміне қатысты қылмыстық істі қайта жіктеді.

Бұл туралы Orda.kz хабарлады.

Қайғылы оқиға 10 қазан кешке орын алған. Дәрігерлер келіншектің өмірі үшін күресті, бірақ ол алған жарақаттарынан есін жимастан көз жұмды.

– Жаңадан ашылған мән-жайларға байланысты ҚР Қылмыстық кодексінің 306-бабының 1-бөлігінің қылмыстық ісі ҚР Қылмыстық кодексінің 306-бабының 3-бөлігіне қайта квалификацияланды. Тергеу жүргізілуде. Бұл қылмыстық іс аясында полиция аттракцион ұйымдастырушысының осы қызмет түріне лицензиясы бар-жоғын, қауіпсіздік ережелері сақталған-сақталмағанын анықтап жатыр, - деп қосты полицияда.

Бұл бап бойынша қылмыскерлер 8 жылға дейін бас бостандығынан айрылуы мүмкін.

Тарзанка - экстремалды спорт түрі, альпинистік арқандар мен құрал-жабдықтардан жасалған күрделі серпілісті жүйенің көмегімен биіктіктен секіру. Секірудің бірнеше түрі бар: өз еркімен құлау және өз еркінсіз құлау.