Қарағандыда төбелестен соң академиядан шығарылған курсанттар оқуларына оралды

Қарағандыда Бейсенов атындағы ІІМ академиясының екі курсанты оқуларын жалғастыру үшін сотқа арыз берді. ЖОО басшылығы оларды заңсыз оқудан шығарған. Ол туралы Қазыбек би ауданының №2 сотының шешімінде хабарланды.

Іс материалдарына бойынша, арызданушылар өткен жылдың қазан айында академиядан шығарылған. Оқу орнының айтуынша, бұндай шешім қабылдауға олардың арасындағы толассыз төбелестер мен келіспеушіліктер себеп болған. Арызданған курсанттар сотта төбелеске қатыспағандарын, академия қызметкерлері оларды солай мойындауға мәжбүрлегендерін айтты.

Өткен жылдың 21 қазанында кешкі дәстүрлі сапқа тұрудан кейін екінші курс студенттері мен үшінші курстағылар арасында жанжал шығады. Осыдан кейін арыз беруші жігіттердің бірі соққыға жығылып, медициналық көмек алу үшін емханаға барған.

Алайда, ол өзін сабаған адамның атын айта алмады. Академия қызметкерлерінің қысымымен жазған түсініктемесінде ол екінші арыз берушіні көрсеткен. Нәтижесінде екі жігіт те тәртіп бұзғаны үшін оқудан шығарылып, қызметтен қуылды. Сот барысында академия басшылығының бұл іске салғырт қарағаны анықталды.

Олар қызметтік тексеріс туралы бұйрық шығармай, тергеу протоколын жүргізбей, курсанттардың түсініктемелерін тартып алып, өздерін оқудан шығарып жіберген. Оған қоса жігіттер оқудан шығу туралы бұйрықпен толық таныспаған.

Сот іске қатысты барлық жағдайларды ескере отырып, академия басшылығының әрекеттерін заңсыз деп таныды. Академия басшысының бұйрығы жоққа шығарылды. Курсанттар оқуына қайта оралды. Сот ішкі істер министрлігіне жеке анықтама шығарды. Онда академия тарапынан анықталған заңбұзушылықтарды жеткізілді.