Қарағандыда полицейдің қатысуымен жол апаты болды

Қарағанды қаласында көлік тізгіндеп отырған полицейдің қатысуымен жол апаты орын алды, салдарынан бір жасар бала қайтыс болды. Оқиға орнында түсірілген видео желіде тарады.

Бұл туралы Orda.kz хабарлайды.

Облыстық полиция департаменті жол апатының 19 қазан күні кешкі сағат 21:45 шамасында болғанын анықтады.

«Алдын ала ақпарат бойынша, 37 жастағы полиция қызметкері Mercedes автокөлігімен кезекті жұмыс күнінен кейін Республика даңғылымен үйіне қайтып бара жатқан. Ол Республика-Дүйсембеков көшелерінің қиылысындағы бағдаршамның сары түсіне өтіп кетіп, 29 жастағы жүргізушісі бар ВАЗ-2114 автокөлігімен соқтығысқан.

Жол апаты салдарынан ВАЗ-2114 автокөлігінің ішіндегі бір жасар бала алған жарақаттарынан көз жұмды. Автокөлік жүргізушісі мен 27 жастағы жолаушы түрлі жарақаттармен медициналық мекемеге жеткізілді. Аталған факті бойынша ҚР ҚК 345-бабы 3-бөлігі бойынша қылмыстық іс тіркелді» делінген Қарағанды облысы ПД баспасөз қызметі таратқан хабарламада.

Ведомствода атап өткендей, 37 жастағы Mercedes автокөлігінің жүргізушісі уақытша ұстау изоляторына қамалды.

Қарағанды облысының полиция департаменті марқұмның туыстары мен жақындарына қайғырып көңіл айтады.

Қарағанды облысы ПД баспасөз қызметі